火星號列車/暴太郎戰隊/異星戰境/雷朋三世卡里奧斯特羅之城/哥斯拉×金剛：新帝國/麻辣教師GTO Revival/捉鬼敢死隊冰封魅來

法國動畫電影［火星號列車Mars Express］所有科幻概念都好犀利！所有機械設定都非常正！大部份畫面用簡單線條平面落色做出強烈獨特風格！沒有多餘筆觸，動態掌握全神利落！故事亦交到貨！但我不慣聽法語，如有英語配音會好些，當然有廣東話就更好。

 

睇完50集廣東話配音暴太郎戰隊Don Brothers，正面評價係故事一反以往超級戰隊格式，大膽頑皮跳脫！負評係好多bug，劇情有拍出來就明白，冇交代就唔知答案，不能太認真去深究。

其實我睇到13集已想放棄，Don Brothers為何而戰？敵人何來？目的何在？甚至建構的世界觀都唔清楚，但劇情忽然說主角死了，下集換新隊長，吓？咁爆？於是繼續睇。

故事沒有主線，忽然平淡無聊低能，忽然劇力突如其來，就是每集都唔知劇情會點走，迷底未解(有些都冇交代)，好奇心點滴累積吸引我睇完。

［異星戰境］有故事但唔係吸引，非常多文戲，鐘意Jennifer Lopez要睇，因為大部份畫面都係拍佢，鐘意睇機械人可以跳住齋睇打鬥，機設有點似DIACLONE，如果以上兩點都唔中口味，可以唔睇慳返兩粒鐘。

1979年宮崎駿電影作品［雷朋三世卡里奧斯特羅之城］童年時從動漫雜誌看見已經好想睇，但當年冇渠道看，直至唔記得哪一年，ATV晚上終於播出，但我當晚又有街去，睇咗少少就冇睇，好耐之後，翻版光碟時代到現在數碼視頻年代，都總係的唔起心肝找來看，早幾日終於準備好心情看這套想睇幾十年的動畫，睇完，帶著前作［高立的未來世界］影子，有幾場戲略為慢了點，45年前的製作是相當出色，如果......能在兒時看......一定很興奮雀躍。

［哥斯拉×金剛：新帝國］保持水準節奏流暢，金剛一連三集的成長和今次牠的結局都寫得幾好，哥斯拉始終是［哥斯拉II：王者巨獸］最勁，牠雖然是泰坦怪獸之王，但在金剛身邊只能發揮猛獸野獸本色，今集地底世界的景觀構成同各種生物設定都比以前更豐富吸引，這電影系列來到這集已很成熟，會否再有下集呢？如果有，希望有個突破性劇本。

我冇睇GTO漫畫，以前好似只係睇過幾集反町隆史日劇麻辣教師GTO，都冇乜記憶，抱住陌生感同懷舊心情睇下2024年嘅GTO Revival，初時誤會係連續日劇，原來係一集完，哦！故事同手法幾老土，類似故事在其他日劇都睇唔少，真係冇乜新意冇乜沖擊。

之後睇返1998年日劇，雖然已敵不過歲月洗禮，有啲乏味，但仍有些微追看性可以睇晒。跟住睇埋1999年劇場版，呢套就真係畫蛇添足嘅垃圾，唔睇冇所謂。

從前某日，同學帶我搭巴士去新蒲崗麗宮戲院，睇二輪上映早場捉鬼敢死隊，係我第一次去呢度，當時唔知捉鬼敢死隊係咩戲，入場睇到啲鬼飛嚟飛去，有啲造型幾得意，捉鬼槍激光四射，巨型棉花糖鬼出場好突然好震撼，對我呢個中一生嚟講真係好精彩好豐富好緊張刺激好好睇！

第二集充滿期待去睇，哦！故事竟然走現實社會路線，曾拯救社區嘅英雄點樣受反對者抨擊打壓，點樣搵唔到錢難以經營業務等等，大堆文戲忽略咗捉鬼主題嘅娛樂性，冇諗過故事會咁，只期望愈捉愈勁，所以好失望。

30年後第三集上映，都幾突然，抱懷舊心情去睇，唔係好睇，只係好似見返一班幾十年冇見嘅朋友，柴娃娃聚舊睇完就算，冇諗過會有第四集。

知道有第四集捉鬼敢死隊冰封魅來，睇宣傳片幾吸引，心諗呢集會唔會拍好啲，拍到第一集嘅感覺呢？哦！睇完，個頭開得幾好，但之後竟然又走回類似第二集劇情，只係加插咗家庭戲，沉悶咗大半套戲，最後草草收場，可能第二三集都唔係好睇，所以冇火滾。