機動戰士Gundam seed freedom / Believe 為你架起的橋樑 / 芙莉歐莎末日先鋒傳說/ 蒼鷺與少年

機動戰士Gundam seed freedom我可以講係繼2010年Gundam 00 -A wakening of the Trailblazer之後，另一套好睇又高水準嘅高達電影！雖然故事重提「命運計劃Destiny Plan」但不覺得畫蛇添足。

當然若以前冇睇Seed係唔會知講乜，就算我有睇，冇做事前溫書，怕被劇透冇睇新故事背景資料，要一下子從字幕接收故事的新世界發展、地球各國情況、宇宙情況、新勢力、誰打誰，新人物和外傳角色，睇得字幕又追唔上畫面，睇畫面又甩字幕，兩者兼顧到腦中又未及思考，係有點跟不上，對現在新局面未能一時間全部了解，抱住先睇一次當備課的態度去睇，過了初段，劇情較為塵埃落定睇得舒服爽快。

昨日睇完，今日已上網睇資料抽少少時間再睇，先會再細看劇情對白，可能分幾次睇唔急一次睇晒，之後有時間仍會再睇幾次，睇到畫面入晒腦為止，因為戰鬥場面好吸引，電腦製作畫面豐富，動感速度高，睇到眼花撩亂，可以睇N次唔悶！

我好鍾意Gundam seed系列電視動畫，故事好，製作水準穩定，雖然人設機設同我口味有些差異，但Gundam seed係我心中高達系列排名的Top 2！

日劇［Believe 為你架起的橋樑］未算好好睇，但都OK，我覺得係木村拓哉自2019年摘星廚神之後比較好嘅一套電視劇，故事玩未到最後都唔知誰是忠誰是奸誰可信，喜歡第8集主角兩公婆在家傾談，唔知太太是否出賣丈夫，唔知警察幾時闖入的氣氛，第9集結局有點急，但亦算是灑脫講完故事。雞蛋裡挑骨頭係木村拓哉在劇中刻意擺脫星味，但其中一集佢裂肋骨竟然單手握鐵欄翻筋斗越過對面，真係一百分型爆，坦白講我冇病冇痛都做唔到。

［芙莉歐莎末日先鋒傳說］睇到導演好有心去拍，不過故事冇高潮，只係將主角的成長歷程一五一十拍出來，補充她在上集的來龍去脈。個人認為Christopher Hemsworth演出可以瘋狂些，會帶動劇情多點壓迫感，現在這角色只係個膚淺的癲佬。

偶像宮崎駿大師動畫電影[蒼鷺與少年]，在人物動態、衣衫線條、彩稿背景細緻度，都有一些部份與以往他的作品不同，這種新鮮感開頭我有小小睇唔慣，適應後就覺得宮崎駿老師在這年紀還有心打破慣例，十分尊敬他這種創作精神。

至於故事並不難明，首先要明白一個荒誕奇異的創作世界，就係可以不用邏輯多解釋！如果下下都用現實理論解讀，就不是童話了！這亦是宮崎駿老師的創意魅力所在！

故事簡單講，一個人唔知點解得到一種神秘力量，可以創造自己喜歡的世界，這隱喻逃避現實選擇活在虛幻自我世界，在這裡雖然可以活很久，但終有老死一天，死後這個創造的世界亦隨之毀滅，這人臨死前想找血脈相連的後人承繼創造自我世界的力量，他設計「邀請」、「誘惑」、「挑釁」後選人來挑選，有落選者留低生活而得到某種力量，有在媽媽肚內等待出世的後選人，而主角得到繼承權卻放棄，因為他在虛幻世界的冒險中學懂結交朋友，與人相處，還接受了後母建立感情，選擇活在現實，不逃避活在虛幻世界是無可厚非，正如日本電影名［君たちはどう生きるか］意思是「你如何生活？」。

這電影節奏溫和，不商業，after taste濃厚。