近期睇的動畫、劇集、電影

 

機動戰士高達：復仇的鎮魂曲

6集完，故事直接，沒有多餘情節，爽！

其實我一向對呢類冷冰冰嘅電腦動畫人物冇好感，但今次睇到製作水準很高，臉上表情開始自然少少，所以冇咁大抗拒，不過肢體動作仍是生硬有待改進。

至於機動戰士嘅戰鬥和軍人嘅戰爭製作都非常出色，動作設計流暢，構圖很好，有些鏡頭運用亦充滿真實感，機械設定每一款每一種類都十分正！期待整個系列出晒MS模型，坦克、軍車等等都極吸引，可惜我唔玩軍士模型。

好似好耐都冇一套Gundam可以寫好一個主角，較近代成功嘅已經係多年前嘅三日月、澳加、波雷12號(配角)，之後水星的魔女蘇萊塔第一季本來唔錯，但第二季故事就180度大扭轉差得離譜，今次呢套復仇的鎮魂曲主角Iria Solari我覺得寫出感性味道，有一份人生無奈、戰場悲壯嘅感慨。

另外，劇中出現08小隊自護軍角色Yuri Kellerne，把故事時間線連接到08小隊，係有驚喜！

最近又重溫一次機動戰士高達SEED動畫系列，很喜歡它的世界觀，人性刻畫細膩，記錄一下這廿年來我睇過的次數。

機動戰士高達SEED 5刷

機動戰士高達SEED DESTINY 4刷

機動戰士高達 SEED C.E.73 STARGAZER 2刷

機動戰士高達SEED FREEDOM 3刷

因為鍾意呢套《奇異賢伴黑色天使》嘅機設所以睇卡通片，但真係唔啱我口味，故事用生活日常去發展，戰鬥部份輕描淡寫，結局草草收場，我曾經放棄睇幾次，不過近期冇乜嘢好睇又斷斷續續咁睇埋落去，難怪呢套卡通嘅玩具模型反應冷淡。

最初睇到［Ultraman: Rising］宣傳片，完全接受唔到呢個Ultraman造型，湊火雞仔片段亦嚇親我，所以一直冇興趣睇。

不過近排睇咗多套港產片、荷里活電影、動畫電影、動畫劇集都失望、悶、甚至爛！都無謂去評論，既然係咁不妨再挑戰底線睇呢套［Ultraman: Rising］。

哦！故事出奇地好，講親情，講養育之恩，畫面製作靚，分鏡爽快、很多構圖唔錯，火雞仔表情動態都極得意！睇完真係大大改觀，有興趣睇第二集。

中伏！由於冇做功課，唔知道［傳說巨神伊迪安］TV版係嚴重爛尾！捱咗39集！

據說要睇劇場版下集先有完整結局，不過暫時唔知邊度有得睇。

講返TV故事唔算好睇，好拖拉，我覺得只有主題，冇做好每集劇情細節，好空洞，約在29集開始密密推新武器新力量，開始不斷死人但感覺唔到有高潮，結局在最後一刻突然交代故事完真係離譜。

兒時常接觸傳說巨神伊迪安玩具、模型、公仔書同貼紙，但冇興趣睇動畫，香港亦冇播放，早年因為他在超級機械人大戰有超強武器表現，講到好犀利，所以想睇下動畫係咪咁勁。

怪獸8號動畫第一季只得12集實在唔夠喉！我鍾意睇，夢想、熱血、友情描寫恰到好處，製作水準穩定，戰鬥畫面有勁，希望之後季度可以保持到啦。

Netflix劇集［Eric 布偶尋蹤］以80年代紐約為背景，有一班好演員，演出精湛！有一個怪誕帶懸疑的好劇本，同時又能反映當時社會狀況，有一位好導演，把電視劇拍出電影味道！氣氛營造很好！喜歡劇中挑選的80年代歌曲。

填詞L，係一套好L好嘅港產片，有一個好L好嘅劇本，有一位好L好嘅導演，有一位演出好L好嘅女主角，有一首好L好聽嘅主題曲，片中所有插曲亦好L好聽好L有90年代K歌feel，真係感L動到我，相信亦感動到好L多有夢想或曾經有L過夢想嘅人，enging收得好L好。用咁多L形容係配合片名，Respect！

**其實近期都睇咗唔少爛片、悶劇，不過唔想浪費時間評論了。