近日睇的電視劇同電影

 

三命故事有始有終，有板有眼，紮實，沒有挑剔，不過鐘唔鐘意就好睇個人口味，我就覺得三個多元宇宙的故事都很樸實，雖然利用交叉時空的剪接手法，但描述演繹上略為平鋪直敘。

拍攝上，故事在60年代拍得很好，鏡頭擺位有心思避開了穿崩畫面，但到70-80年代時，街景外景常拍到現代汽車和現代大廈風景入鏡，有時臨時演員穿著現代服裝和梳現代髮型，每次睇到都令本來投入的我愕然抽離。

另外，男主角中學時都算靚仔，貌似陳偉霆，但出來工作時就變了青年版陳惠敏！太大改變了！有點難接受！再之後換成陳國邦飾演，而根據網上資料陳國邦今年57歲，飾演佢老竇的張錦程係59歲，飾演佢媽媽的陳佩思40歲，其實係咪可以由青年版陳惠敏繼續飾演長一段時期，真係到大叔時候先再更換男主角呢？

其他小沙石就不在雞蛋裡挑骨頭了。

值得一讚，女主角之一陳佩思演出很好，十分有驚喜！

武替道故事紮實，直接到肉，有激情，有感動，角色性格鮮明，時代轉變下新派舊派立場不同下衝突見火花，畫面實而不華，拍出味道！又係一部近年港產片佳作！

電影焚城開頭在災場發生嘅驚天動地大爆炸，處於中心點班消防員竟然冇被炸死，最主要嗰班演員仲拍到尾，我接受唔到，一路影響睇戲心情。

係咪可以修改好啲呢？例如消防隊team A先到場之後近乎全軍覆沒，再由Team B、Team C 作主線接手去救援。

另外，災場內兩位英勇救人嘅消防員阿Dee同Locker，如果在大爆炸前落咗匿藏黑工嘅建築物地庫搜索搜救，避開爆炸嘅直接傷害所以冇死，會較合理。

還有，全港消防員都出動，但就冇主演以外嘅消防員參與最後搜尋銷毀核廢料行動？如果多幾位其他區勇敢捐軀嘅消防員出嚟參與，又有主要演員估佢唔到唔想冒險走人，會更有劇力，故事世界會更大更立體！而且呢一幕仲可以玩橋、玩人性、大義、內心鬥爭、決擇等等，而家冇，直落，真係浪費。

而在開場序幕之後，出現華仔兇惡眼神底光大頭，配上對白「天災有時不及人禍.......」呢個鏡頭好突兀！好尷尬！其實無需要，直接出戲名配上這句對白已足夠。

套戲唔算差，唔係要插，我只係覺得可惜，難得有個唔錯嘅劇本構思，只要在小問題上修正、理順，可以好好多，而家就係差呢啲，扣咗分。

破地獄戲味濃郁，用心製作，不過並非我口味，睇完沒有什麼感覺，係我太冷血？太自我？太自私？還是電影故事對我來講都係習以為常？

但仍然支持這類型港產片，希望未來可以有更多用心製作的香港電影，拍出香港獨有風味。

米奇17號故事概念非常新鮮有趣，不過...套戲就睇到我有少少昏昏欲睡，首先前段很多自述，我很怕睇這種表達方式，短還可以，但太多太長我會愈睇愈感煩悶，好彩劇情帶著小玩味所以都睇到落去，但後段推進緩慢，亦少咗趣味驚喜，收尾較為普通，直至埋單最後一幕先再有趣味劇情。

套戲唔係差，但未睇嘅話，建議精神狀態好先睇。

網絡電影電幻國度好悶，捱住睇完，如果唔係想睇男女主角Millie Bobby Brown同Chris Pratt一早就唔睇。

其實故事創作嘅世界唔錯，有吸引處，結局有一節出乎預料，具意義，但冒險旅程太平淡沒趣，節奏緩慢，很多時畫面色調灰暗，真係好易瞓著，雖然電影特效畫面做得好，很多機械人出現，設定包羅萬有相當豐富，最後亦有一場機械人大戰，但不精彩，難以力挽狂瀾。

冇睇過原著小說，所以唔知係導演出問題，定係本身劇本都係咁悶。

首先不要誤會，無痛俠唔係超級英雄電影，男主角只係一個天生沒有痛感的普通人，忽然英雄救美的故事。

無論是故事、畫面、打鬥、趣味性、驚喜度，都普普通通，開始時節奏慢幾悶，劫案發生後入正題才有轉變，整體唔算太差，不過緊張刺激欠債，若你有好多戲等住睇，或者偷閒睇戲時間唔多，唔睇並不可惜。