近期睇嘅電影、電視劇

魷魚遊戲2+3一個故事拆開兩季播，我覺得完全錯晒，而家網絡咁多劇睇，好快觀眾就忘記之前睇過乜，加上第2季好悶唔好睇，仲中途暫停，會趕客？定係好多人期待下季？我因為睇咗上半場，要睇埋下半場，所以睇，並冇任何期待心情。

點解我覺得魷魚遊戲2+3季唔好睇？因為聖鬥士星矢講：「同一招出兩次係唔會再有效！」，故事換煲不換藥，又再嚟一次，睇嘅時候已經冇第1季咁新鮮緊張刺激，了解套路，參賽者都係要死，冇晒感覺，而且今次有啲角色都幾煩幾討厭，在我角度睇唔死都冇用，整體節奏緩慢拖拉，人性描寫婆婆媽媽！

另外黃警察追查尋島故事係畫蛇添足，到最後係令遊戲負責人毀滅個島，但唔一定需要呢段枝節都可用其他較簡短故事講述！

唯一令我有啲驚喜嘅兩點，係第2季第一集主角成奇勳搵到西裝男同佢賭命，同第2季最後一集成奇勳帶領參賽者反擊。

PS: 第3季睇完第一集已經悶到想瞓，第二日再繼續睇，睇咗四日先睇完第3季六集。

記得雷霆特攻隊電影上畫時宣傳得好勁，話票房好好，係近年最好睇嘅Marvel電影等等等等等等等等.........

講真，呢套電影又唔係唔好睇，又唔算差，不過我覺得同宣傳有好大出入，雖然我知係迪士尼電影，但真係非常非常非常之迪士尼囉！同預期好大分別，有兒童迪士尼故事感覺，好大愛！好和諧！可以列入教育電視，如果有米妮老鼠同迪士尼公主同場演出，或加入歌舞元素就哈哈哈哈哈！

自從迪士尼收購咗Marvel後，Superhero電影好多口多多吹水搞笑，係想令Superhero親民啲，小朋友會喜愛多啲，但我覺得只係將Superhero小丑化！唔係Batman嗰個小丑，真係馬戲團提供快樂畀觀眾嘅小丑。

殺神John Wick之芭蕾殺姬，整套戲都好難令我信服，主角Eve係一個已經準備好出道，去保護人又好，殺人又好，總之係個好勁好有潛質好有本領嘅女子，一個人剷平整個殺手小鎮，但我只見到佢嘅花拳繡腿同低級搏鬥，真係完全感受唔到強大力量同魅力！係導演問題？係編劇問題？係武術設計問題？係女演員問題？定係每個崗位都有問題？一切都流於表面，好牽強，好夾硬嚟，無法投入。

PS：大玩火槍我一啲都唔覺得勁，反而感覺低手，John Wick客串亦無補於事。

暗算(The Accountant)第一集2016年上映，相隔9年第二集2025上映，隔咁耐再拍，心中係有啲期待，可惜睇完第二集我係感到非常失望。

先講第一集，故事紮實，劇情動作片雖不算緊張刺激，但槍戰同格鬥夠兇狠寫實，男主角Chris設定獨特，描寫得很好，有存在感，的確可以繼續發展落去。

但第二集故事本身都唔多好，人物同組織多了，令節奏鬆散，悶場多，兄弟情章節十分無聊，悶上加悶，兩位男主角樣貌老了很多，性格變得風趣搞笑，行為稚氣，推倒第一集建立嘅「專業」魅力！

拼命三郎電影主要演員演出都落足力，尤其是鄭浩南好搶戲！拍攝、剪接、燈光、佈景、畫面構圖佈局、搏擊格鬥樣樣都見到有用心，唔差！

只可惜故事十萬個老土，譚耀文造型令我想到誓不低頭的謝文武，唔講道理火爆硬頸過氣出獄黑幫大佬人設一啲都唔討好，有場戲他被人打到成身傷之後，浸浴時身上同塊面竟然完全冇瘀傷，之後額上傷口唔連戲常錯位，呢度真係扣好多分。

總結，父子情未能感動人，勉勵奮鬥人生又未到位，ending有啲尷尬，不過悶悶哋又冇嘢想睇，又唔想睇翻譯字幕，聽下廣東話送飯睇下無妨，我分開咗兩次睇。

鋼鐵心(Ironheart)電視劇共6集，首先我對Ironheart冇乜好感，她首次現身是在Marvel電影黑豹2，電視劇時間線在電影之後。

劇情唔講太多，只講講感覺，頭兩集我覺得唔好睇，有諗過罷睇，不過Marvel電影電視劇我一向溫書式煲晒，所以迫自己繼續睇落去，去到第三集竟然好睇返啲，因為壞人boss開始浮面，有睇頭，之後另一壞蛋誕生又幾吸引到我，到最後終極大boss現身更是驚喜！

總結，Ironheart最好睇最吸引到我睇嘅全部係壞人，主角就只能說僅僅可接受到，最後一集最後一場打鬥真係畀佢fake到我，ending收得好好有啲釣癮。

私家偵探故事寫得幾好，廣東話對白到肉，嗒落有味，主要演員古天樂、周秀娜、劉冠廷表現幾好，配角張兆輝幾搶戲，唔錯，幾好睇！

睇得多商業電影，轉下口味睇套非主流墨西哥電影Corina(科琳娜)，故事講一位患有廣場恐懼症的少女，因為工作上一次突如其來嘅犯錯補鑊，首次走出生活舒適圈，來個勇敢小小冒險。

主題和故事幾有趣，亦可以認識一下墨西哥電影係點樣，喜歡睇非主流電影不妨細心欣賞。