早輪同小學同學閒聊，記起呢件事。
四十幾年前小學時，我拍過一次港台教育電視節目，冇對白冇大頭，只記得有一個鏡頭係選出五六位同學，我企在最側邊，當主演同學講完對白，我哋其他同學就點點頭，就係咁多，之後全程拍攝都係在主演後面行行企企，走來走去通山跑。
不過呢集教育電視我從來都冇睇過，亦唔知係咩年級咩科目嘅節目，因為從來冇老師話我哋知，雖然好想睇，但一直係個謎。
我仲記得當日十幾位被選中嘅同學，照常返學集合，但唔使上課，坐港台安排嘅旅遊巴出發去郊野公園拍外景，拍完之後嘅報酬係請我哋到港台canteen食嘢，在後面大約相隔四五張檯，我見到偶像蔡楓華哥哥，同埋靚姐姐鄧藹霖，再遠啲仲見到區瑞強，不過我冇膽走過去打招呼。
呢個「體驗」真係非常非常非常之開心！
沒有留言:
張貼留言