2014年2月20日 星期四

小露寶的情結




我好細個時幾乎有齊全套小露寶超合金,但有一晚老豆把所有小露寶超合金用膠袋袋起,隨即拿去送給他朋友的仔女,當時我不懂反應,但依稀記得媽媽對我說:『 唔好喊,我買過 d新嘅俾你。』

結果當然係冇再買小露寶超合金,就係咁它們成為我的美好回憶,我很喜歡玩它們,所以它們每款的玩法我今日都記得。


約在90年代尾,環球模型生產線Dragon公司出了一批《小露寶》同學膠公仔,定名 Robocon collection,最初推出每款售價約HK$80至HK$100,但最後難逃割價命運。我在環球模型購買,除了小露寶和鋼鐵老師沒有減價,其他角色全部一律只售HK$10,我買了8隻減價貨。

兩三年後,我再發現餘下兩三款角色一減再減只售HK$5!這批膠公仔造型、物料和生產質素都唔錯,不過遇上97金融風暴後經濟低迷,玩具熱潮過期冇人買,才導致大割價套現。


小百加 (環球模型膠公仔),看它造型傻頭傻腦就知角色性格,它的技能係『甩頭甩骨』,超合金玩具都有這種玩法,塑膠公仔就沒有這功能。(這玩具身價最低迷時我見到只售HK$5)

小百多 (環球模型膠公仔),造型上與小露寶其他角色格格不入。

小百拳、小百威是兩兄弟 (環球模型膠公仔)


小百明 (環球模型膠公仔),小露寶同學角色中我最喜歡他,故事中他是一位非常努力讀書的機械人,但結局是讀因為讀書壓力太大,最後他讀壞腦傻了! 這故事令我很害怕呢,可能就是這樣令我討厭讀書。


小百皮 (環球模型膠公仔),他拉著流動熟食小販車賣煨蕃薯,水煲形的頭部會倒茶給客人。可惜這膠公仔沒有『煨蕃薯車』附件,否則一定更吸引。

小百通 (環球模型膠公仔),他從事建造業,性格擔屎唔偷食非常老實,現在社會還有這類人嗎?


小吱喳 (環球模型膠公仔),我覺得這玩具的造型已經唔錯,不過之後日本推出的『膠魂』小吱喳更勝一籌。

小吱喳 ( bandai 膠魂) 造型比環球模型版更精緻,身體膠戲服的紋理都刻劃出來,設色上更到位。 膠魂和環球模型版擺埋一齊睇,明顯看出分別,高下立判。
小露寶( Bandai 膠魂) 公仔造型非常討好,很多部位都很精緻。

打開肚子蓋見到機件,非常細緻。