中佬的足球場讀後感

洛文Rodman Lok (雞尾老師) 最近自資出版嘅［中佬的足球場］漫畫書，我前後加埋用咗四個鐘睇完全書約250頁，好多感受，但唔想劇透，只簡單講下。

內容話題豐富，踢波睇波同相關週邊嘅事物都一一涉獵，甚至技術戰術教材都唔放過！此外，人生歷練、際遇、奇遇都投放咗深厚感情去描寫，有感性亦有會心微笑。

以段落形式寫一個故事就似讀書時作文一樣，有靈感並不難，但要把故事寫成不同角色嘅對白，用對話去清楚講出故事係十分難，漫畫家洛文就成功做到。

漫畫方面，製作水準之高無容置疑，說故事嘅構圖構思手法具電影感，開場第一段「片頭」同裡面一段「主觀鏡」好正！

中佬的足球場，故事成熟，不瘟不火，給我淡淡然感覺，一邊看一路湧出很多回憶，就似同老友摸杯底講波經、交流人生點滴、回味年少輕狂日子！

當然！如果你唔係中佬，唔係大叔，唔鍾意踢足球，唔鍾意睇波，唔睇漫畫，呢本作品你一定唔會想睇，一定唔會了解當中嘅情懷同味道！苦瓜、黑啤、齋啡嘅味道！

各區漫畫店現已有售！

中華書局、三聯書局、商務印書館稍後上架！

每本HK$100

盒制作所出版