之後故事開始轉為公路電影，開始行劇情，冇再買弄性慾場面，棒打鸳鸯帶點瘋狂，童話式戀愛是真是假亦令我想睇到最後，雖然整體冇乜高潮起伏，但過程流暢爽快，暗地裡拍到另一場愛情嘅萌芽亦算自然舒服，結局留下給觀眾想像，算有戲味。
本想分享一些睇法，但不寫了，配合電影，好嘢有時係不用言喻。
雖然MCU在電視劇同電影都話畀大家知佢哋好需要美國隊長，有好多要堅持嘅理由，好多故事支撐，但新任美國隊長應否存在？相信在觀眾、票房同口碑中已有明確表態。
電影美國隊長4勇敢新世界故事唔算太差，但拍出嚟絕對講唔上好睇，有點平淡老調重彈，動作場面亦冇乜震撼，只係好正路說完一個故事。
其實一套超級英雄電影好唔好睇，可以好簡單，睇完大家覺得電影中的超級英雄真係好勁好型好英雄有after taste就係好睇，睇完覺得超級英雄平平無奇，甚至婆媽老土冇feel就係失敗，而這電影最明顯嘅致命傷就係ending，不劇透，睇咗有同感自然明白。
最近先睇2016年由米路吉遜執導電影鋼鋸嶺，以前對歷史戰爭片興趣唔大，因為兩年前去咗鋼鋸嶺一遊才想睇，想了解下這個戰役。
電影係拍一個真人真事，以男主角角度去見證這場戰役，所以電影對戰役描述唔多，要了解詳情真係要搵歷史資料讀一讀。
故事序幕係男主角在戰役中退場，隨即跳到他童年作開始，但描寫未夠深入，轉眼就成為青年，進入愛情和參軍受訓故事，大約佔電影頭一小時，可能係真人真事所以不加入娛樂性趣味，對我嚟講係好悶，捱住睇，男主角蜘蛛俠Andrew Garfield在這段落時常天然呆嘅笑容，令我覺得好難頂，似傻仔而不是單純樂天。
跟住故事開始踏上戰場，都有一粒鐘，氣氛180度扭轉，哦！好睇！醒晒！由於睇之前冇睇電影簡介，所以有驚喜，這個真人真事亦很神奇！值得宣揚！
電影取景並非在原址拍攝，今日鋼鋸嶺是沖繩浦添大公園其中一部份，係個景色優美非常舒服的旅遊地方，可以輕鬆行山，保留很多戰時遺跡，王朝遺跡，有間小小博物館收藏一些戰時物品，有多個兒童遊樂場，想不到當年這裡死了無數軍人，發生過如此慘烈戰爭！
歌舞片魔法壞女巫在服飾同場景設計上都好用心好落本，不過太貪心分上下兩集拍攝，導致第一集故事簡單，節奏緩慢，幾悶，如果一集拍完會緊湊啲劇情豐富啲，歌曲是否悅耳看個人口味。
獅子王木法沙......睇咗一陣就放棄冇睇落去，唔介意佢成日唱歌唱對白，而係完全唔鍾意不能接受太過真實製作嘅動物卡通造型，因為馬騮野豬等等過份真實係有啲肉酸樣衰，仲要睇高清睇佢哋扮可愛唱歌係有啲不安，cute造型較適當。
哪吒之魔童降世因為電視播廣東話版所以睇下，聽廣東話母語配音嘅動畫最易入腦最易接收，咦咦，故事ok明快，製作水準很好，一改我對國內動畫電影印象。
記得童年時婆婆帶我去戲院睇哪吒卡通電影，兒時亦鍾意睇歡樂今宵播出嘅封神榜，所以我並不討厭哪吒這個傳統中國神話人物。
故事概念以日本象棋棋局演變為打官司戰術算有新意，可惜我完全唔識日本象棋點玩，所以投入唔到唔知搞乜，8集完，係好保守好一般嘅日劇套路，臨尾都係用感動人嘅溫情大道理作結都幾老土，最後兩集有些少改變，但為時以晚對套劇幫助唔大。
最開頭係有少少唔慣，因為劇中大部份係靜態場面，多數章節係幾個人茶聚坐著不停吹水，或上班時偷偷閒聊，總之就係用大量對白去推進故事，只要適應了就好易睇好想睇落去，因為呢啲同朋友同事吹水的確係日常生活。編劇團隊寫大量對白亦絕不容易，一定要功力深厚，呢點我很欣賞。
故事最吸引我嘅地方係SF元素！但並非夾雜大量科幻特技，而係從平淡小鎮生活裡透出來，愈睇愈多驚訝，幾有趣！全劇在山梨県拍攝風景優美。
之前在串流平台見過呢套日本網絡電影［入侵者們的晚餐］，但poster極不吸引所以冇睇。
近日睇咗同一編劇「笨蛋節奏」嘅日劇［小鎮星熱點］覺得幾好睇，再經FB fd William Ben Chiu推薦［入侵者們的晚餐］就撳嚟睇。
咦！故事果然同樣有趣！雖然前面節奏略為慢，但一入局就緊湊到尾，逐個角色一層一層慢慢抽絲剝繭，將一個小故事小鬧劇添上很多趣味！
講返套電視劇其實OK唔差，唔會太悶，唔算太兒童向，但又未到最好睇嘅Ultraman劇集級數，不過尾段在故事同氣氛上都愈拍愈好，算係標返個尾會留下好功績，所以壓軸上映嘅劇場版竟然反高潮係有倒米感覺。
動畫TV版共26集，製作水準集集都保持得很好，分場、剪接、對白、戰鬥、構圖等等表現手法同新世紀福音戰士十分相似！故事充滿神秘感又緊湊，釣住釣住我胃口要急急追看落去。
機設非常啱我口味，由機械人、戰機、坦克、部件配套等等所有都好正！場景設定都精心設計精彩！配樂搶耳有格調，全套動畫都被藝術氛圍籠罩！
睇完感覺上RahXephon同新世紀福音戰士似一塊鏡，似一個多元平衡宇宙，但一個選擇正面，一個選擇反面，如要二揀一我鐘意RahXephon。
三集打完故事有始有終，但很多前事冇詳細交代，例如兩位男主角同帝皇萬能俠SKL嘅來龍去脈，所以呢三集只能說係個序章，可惜故事未有繼續。
若問我睇完有乜留低？只有帝王萬能俠SKL好好揪，其他角色就冇乜印象，雖然兩位男主角性格突出，但佢哋叫咩名都唔係咁記得。
故事發生在前作磁力鐵甲人50年後，走傳統超級機械人路線，故事本身唔差，不過劇情節奏未如理想，開頭唔錯，跟住就拖拉推進停滯缺乏張力，雖然臨尾期待以久嘅舊主角司馬宇出現，但冇太多發揮，最後我覺得急急草草收場，新男主角熱血冇腦又描寫唔到佢有成長，但最後仲搶去舊主角鋒芒，我對佢印象真係麻麻。
製作上頭兩三集較高質，之後變得普通，叫做僅僅合格，鋼鐵神JEEG最終型態幾吸引，但出場一陣就打完係可惜，值得欣賞係經常重複用嘅合體、出動畫面有速度有力量特別靚，同埋OP主題歌好好聽。
先講下以前睇嘅感受，我唔係咁鍾意未成長前嗶哩巴啦又懦弱嘅少女主角，唔識欣賞GunBuster機械人設定，頭三集出場嘅機械人造型太簡約唔吸引，故事世界觀大但只有6集太短，未投入已經完結，雖然製作水準高，但我在不同時候共睇咗兩次，都冇乜印象留下早已忘記得七七八八。
今次再睇嘅原因，係近年見到很多GunBuster模型和玩具推出，變形合體設計幾好玩，老友亦曾送贈我一隻好靚嘅模型，GunBuster機械人存在三十幾年後亦令我培育出感覺，睇慣咗入咗屋接受咗，加上有幾位朋友都鍾意GunBuster，所以扚起心肝再睇一次。
睇完第三次後，對卡通片係有正面改觀，不過都唔係我最喜歡杯茶，結局一集充滿庵野秀明獨特個人套路，若故事拍成13集或26集詳盡啲描寫細膩啲可能我會投入多啲，現在較為主觀單向，很多情緒氣氛都未夠。
有趣地方係劇中出現非常類似高達0079同超時空要塞嘅背景音樂，亦出現過一些其他動畫角色一閃即逝茄喱啡，向多套作品致敬。
故事好普通，主角變成小孩設定，不知天高地厚不停挑機，面對前作敵人再打打打打打過，睇到第四、五集一度有想棄睇心情，不過都差唔多完，都睇埋落去。以當時製作水準來講算唔錯，機械設定依然好靚好精彩，依煞機械人比前作更有型，只係出場太少，表現未夠突出實在可惜。
沒有留言:
張貼留言