近日睇的電影

鐵血戰士電影向來一集比一集失望，但今次「鐵血戰士蠻荒廝殺」竟令我喜出望外！好睇！

分鏡有心思、構圖佈局有美感，剪接流暢，沒有多餘情節，故事直接簡單，似武俠片的英雄育成，非常爽快！異形電影世界的生化人同機械人舒服地溶合一起，感情上加分，片尾留下續集伏筆！睇完令我有想圈稿的衝動，不過現在冇稿做。

不過若非我這一代人喜歡鐵血戰士，要年輕一代睇極度樣衰的星球人做主角，他們會否接受呢？

「捕風追影」出乎我意料竟然好好好好睇！拍出港式商業動作劇情警匪大片氣派！有劇力滿張力！兵賊鬥志鬥力，同門亦鬥心計，相當精彩！打鬥、槍戰、爆破都做得好睇！片長兩個幾鐘完全不想熄機小休。

梁家輝！梁家輝！梁家輝演的角色真係好型好勁好搶戲！從未睇過這樣的梁家輝！整套電影充滿他的魅力！他獨闖虎穴一幕非常兇猛，勁過三四集的John Wick！這章節由頭到尾都要認真睇不可浪費！

雖然這電影有不少畫面、概念、動作、情節是模仿或參考或致敬或抄襲其他各地電影，但自己不尷尬，尷尬就是別人，或可說是集各家之大成，拍得好就是成功！就是贏家！反正現在是AI創作時代，AI都是左抄右抄。香港票房慘淡非戰之罪，原因或有很多，我不猜度了。

幻想如果兩位主角換成「盜火線」時期的阿爾柏仙奴和羅拔迪尼路應該十分勁，不過梁家輝在這電影中的演出真係無可取代！

「一戰再戰」好睇！這故事對我來說幾新鮮！一開波已被故事帶住走，短時間內要消化背景、人物、組織等等，急促得有點透不過氣，但過癮！之後劇情相當有趣！豐富！瘋狂！又不失真實感！意料不到下有不少驚喜！片長2小時42分充實暢快渡過。

電影配樂同歌曲都有格調，好好聽。

只係想簡簡單單睇套笑片笑下，睇完「臨時決鬥」我只係冷靜地笑了一兩下，好多夾硬搞笑位都笑唔出，氣氛同節奏有點𥹉懦，每個主要角色都有一個想表達的訊息，想做出笑中有意義有故事，不過我只係想簡簡單單睇套笑片笑下，唔需要睇太多逆境生活同人生道理。

「無名指」故事雖然好煽情，但節奏同氣氛處理得好好，鮑起靜(嫲嫲)、郭富城(爸爸)和許恩怡(女兒)的互動擦出激烈火花，對白淚中帶笑又極自然，睇得舒服，我覺得值得看！當然這類社會悲情題材電影不是每個人都合口味。