https://youtu.be/89TPt9huJiw?si=vjbq88YKDN7VSXTa
睇完呢集節目有感而發！
過去有「朋友」唔單止借錢唔還，亦有借CD、VCD、DVD、包包、雨傘、書刊等等唔還，當冇件事，又試過借出保存良好珍藏漫畫後，還返嚟係大半套浸過水風乾後有水印！
曾經有一位中學識嘅好朋友，喺我出嚟工作後問我借錢，我當時人工只有二千幾蚊，佢話冇錢交稅，問我借二千，成個月糧咁滯我又真係借！佢一年冇還但保持良好友誼，第二年又話冇錢交稅，又問我借二千！我又肯借，證明我當時當佢幾好朋友！之後只係有一次我托佢買嘢扣數二百，跟住佢就玩失聯潛咗水冇還錢！以前有喺街撞過佢幾次，佢會扮睇我唔到，有一次我忍唔住拉佢埋牆叫佢還錢，佢就賴皮話身上冇錢撳機都冇積蓄，呢一刻我已經知道佢係人渣中嘅人渣，我有諗過搵人打佢一鑊，但最後冇咁做。
另一單，另一位好朋友問我借兩三千，因為友誼深厚，借完我都冇特登追數，但佢又真係冇主動還錢，之後點呢？佢做小本生意入貨賣插畫卡籃球員卡，搵我幫手拎啲卡返公司幫佢賣，賣到嘅錢就用嚟扣數還畀我！WTF！咁即係感情勒索要我幫佢做sales，賣唔出啲卡就冇錢還！有錢入貨點解冇錢還？不過當時我冇咁諗，只當係朋友有難，幫到幾多就幫啦，咁就拎啲卡返公司睇下有冇同事買，賣咗十次八次，最後係拎得返晒借出嘅錢，整個幫手賣卡過程中，我一蚊都冇食價，朋友定價賣幾多錢我就賣畀同事幾多錢。
最離晒譜一次經歷，係中一時有位新識兩星期，但好啱傾啱玩嘅同學朋友到我屋企偷嘢！佢仲唔只一次，偷玩具、偷電子遊戲機、偷現金！當時有打算報警，但佢認錯要求放過佢，阿媽亦唔想佢一時行差踏錯留案底影響一生，所以冇再追究，但佢偷嘅物品已經賤賣去鴨寮街！又冇積蓄還，最後只係分期還到百零蚊！呢次之後我再冇邀請朋友同學到我老家玩。
以上有啲朋友早已不是朋友，亦有啲我原諒咗佢哋，仍然係朋友，甚至係好老友。我明白有啲朋友並唔係想搵我笨攞著數，只係佢哋性格問題，習慣唔珍惜物品，或者認為借嘅嘢都唔係貴，唔值錢，所以冇放在心，唔記得還，唔見咗，又有將借我物品轉借他人。但物件係我真金白銀去買，買嘅時候可能揀咗好耐、行好多地方先買返嚟，件嘢有冇價值？有冇特別感情？應唔應該好好保留？係取決於我！並唔係由借咗去嘅朋友決定！
係有啲人覺得做朋友，等於做兄弟，金錢同物件都可以共享！唔需要去計較。可能我係方丈，但好朋友如果開口問，想我「送」畀佢，我會考慮下，當然唔一定應承，但你問我「借」，有借有還人上人，我細細個就成日聽到，洗咗我腦，所以我好buy呢個道理道義！
近年「情緒勒索」呢個形容好正！如果上世紀我年少時候懂得呢個名詞意思，或者、可能會避過好多被「朋友」搵笨！利用！甚至出賣嘅事件，不過經一事長一智，成長好多時就係要學習面對以上問題。
以上講嘅「朋友」或「曾經係朋友」大部份我都仲記得佢哋！
仲有幾單離譜事，今次講住咁多先！呢篇發洩積累負能係用衝動感情吐出，冇文化修飾。
沒有留言:
張貼留言