模魂真悟SD Hi Nu Gundam

 

Day 1

第一次買「陸模」砌，二手全新只賣25蚊，見到部件多好似幾多嘢砌，雖知陸模組裝流程一向不及日本大廠，都試下砌當多個體驗，好彩近期有上網睇人砌模型，識得喺每個入樁窿剪一刀，否則出動大力金剛指都未必啪得入。

圖示頭內有個部件砌嘅先後次序唔清晰，或者係我經驗少誤會咗，個頭砌好九成又拆散再砌又拆散共三次先搞掂，至於頭內眼睛附有燈同電芯我就唔安裝，因為我覺得對眼唔著燈時同盲眼一樣，就算係玩具或合金機械人對眼係玩著燈，我都同一理由未必買除非有實色眼件更換，本來諗過油黃色眼但既然有金色貼紙就貼啦。

今日137分鐘砌咗個頭同上身，砌嘅感覺唔差，分件都幾有心思。

Day 2

今日165分鐘砌咗對手、盆骨、槍同盾，今日冇諗過搞咁耐，砌完先知時間過得咁快，仲差對腳、背包同浮游炮未砌，照咁嘅進度睇嚟仲有排搞。

Day 3

110分鐘砌咗對腳同部大份背包，貼貼紙始終唔係強項背包貼得唔係咁好。

Day 4

今日砌埋堆浮游炮、推進燃料箱、激光劍同地台，完成呢隻陸模模魂真悟SD Hi Nu Gundam，100分鐘裡面其實只係砌咗75分鐘，其餘25分鐘係貼5塊水貼，貼咁耐因為要諗貼邊度，同等浸甩塊水貼，貼好影相放大睇先見到盾牌一塊水貼cut爛咗字，剪裁同貼上時戴住老花鏡都睇唔到cut爛咗，算啦唔補貼，反正正常情況下我都係睇唔到，對上一次玩水貼係11年前了！

本想插上地台影相，但機體同地台接口粗幼不一插唔入，都算啦唔修改了，簡簡單單影下啦，隻嘢實物比上網睇人砌嘅相同官圖更討好，模件組裝上雖有些小瑕疵，不過我用25蚊買就冇任何挑剔，砌得有滿足感。