Marvel 電視劇 Jessica Jones 第1季2015年開播，2018年播第2季，當年我唔識呢位Marvel superhero，所以冇興趣睇。
近排因為睇夜魔俠電視劇，在系列之中嘅捍衛者聯盟睇到Jessica Jones，對佢產生好感，所以搵電視劇睇下。
睇完第1季真係覺得好好好好睇！Jessica Jones呢個角色描寫得好好、夠深入，好立體，有溫度！
第2季最近亦煲完，兩季故事都是極度悲劇！編劇同樣出色，分場緊湊細密，剪接流暢，懸疑味濃，夠張力，每集都在緊張劇情下作結，令我心急繼續追看！每個人物、每件事情都緊緊相連，沒有多餘枝節，最吸引係捉摸唔到劇情去向，每集都跟隨安排去睇，很多出乎意料！
2019年去到最後第3季，壓軸重頭故事安排係正確，不過拍攝上就冇頭兩季咁緊湊，感覺有點手緊，冇咁好睇。
而且今季變成雙女主角，Jessica Jones戲份被分薄了，雙線發展令故事打散咗，雖然最後兩條故事線會聚合連成一線，但過程篇章出現沉悶、拖拉、反覆等小問題，未能達至完美。
另一點老生常談主題，就係superhero應否要在法治下制服壞人，不能私了殺害，但壞人往往又能逃離法網，或出獄後再犯案，殺更多人，呢種社會價值觀同市民內心嘅矛盾，好多superhero故事都有描寫，相信唔會每個人心中答案都一樣，但睇得多類似劇情唔多唔少會感到婆媽。
雖說第3季給我整體下滑感覺，但整套劇共3季39集嚟講，係好睇！值得花時間去睇！
沒有留言:
張貼留言