Netflix夜魔俠

 

以前冇睇夜魔俠電視劇，近日一睇就係睇第四季Born Again。

呢季共9集，文戲為主，慢火煲節奏，刺激打鬥少，描寫Kingpin的劇情比夜魔俠精彩，由於第五季才是結局篇，今季只係前菜、麵包、餐湯、沙律、頭盤，最後作結手法有啲似蝙蝠俠黑夜之神，無奈下季要等一年在明年才播。

睇完後，本來冇打算睇嘅夜魔俠一二三季，就全部39集睇晒，由於第二季同第三季中間故事線要轉睇捍衛者聯盟，又要睇多8集，不過捍衛者聯盟故事編寫同拍攝節奏都非常非常非常差！但本身明明係故事系列嘅高潮！結果就反高潮！

講返夜魔俠首三季，同樣係緩慢推進式說故事手法，同樣文戲行先打鬥少，第一季同第三季就算打都好少suit up！想睇夜魔俠造型就會失望，總結係咪好睇？雖然氣氛凝造唔錯，劇情張力亦有，但整體可觀性嚟講只係普普通通，純粹最近冇乜劇想睇，睇開夜魔俠就睇晒全部。

Netflix電視劇夜魔俠呢個角色拍到第四季，其實已經拍爛咗！除非第五季故事有突破性發生！他一直非常婆媽停滯於應該殺死壞人？還是堅持制伏壞人之後用法治制裁？應否收手冷眼旁觀？心態兜兜轉轉自我折磨，而奸角坐完監出嚟又繼續做壞事殺更多人！重複循環循環循環，係睇到有啲唔耐煩。

反而睇咗咁多集，我最喜歡嘅角色竟然係大壞蛋Kingpin，仲為咗佢重看多一次有佢故事線嘅劇集Hawkeye同Echo，之後再煲一次夜魔俠第四季，他在第四季的表現和魅力，我覺得就是Marvel版嘅小丑同丁蟹。

另外在捍衛者聯盟睇到Jessica Jones，呢個Marvel角色都吸引到我注意，所以搵佢第一季電視劇睇，亦睇完，編劇很好拍得幾好，人物和事件環環相扣，懸疑味濃，原來已是2015年製作，我當時冇睇，好彩而家補睇返，之後會繼續睇第二、三季，希望同樣好睇啦。