近期睇的電影、電視劇

On Falling (下流偷生族 / 物流人生) 講述一個葡萄牙女子移居蘇格蘭的生活，拍出一份無奈的孤獨感，拍出日常工作重複重複又重複的沉悶，拍出咬緊牙關的窮困生活，人生就是如此？能甘心渡過嗎？會否找到改變？覓到出路？又或者好似某首歌歌詞所講：幸福快樂其實好簡單？

這電影看似非常平淡，寫實沒趣，沒有什麼大故事，但卻淡淡然滲透出一份無力感，一份悲情，一份憐憫，喜歡非主流電影不妨一看。

諗住搵套唔使用腦，輕鬆搞笑嘅電影睇，睇咗史迪仔真人版2025，已經盡力保持童心去睇，但真係真係真係好悶！故事悶，笑料悶，史迪仔又唔夠搶戲，可能我真係超晒齡，真係要小朋友仔先鍾意睇，唯一讚賞係小演員女主角演出很好，活潑生鬼。

我少睇韓劇，和我老公結婚吧只睇日劇版，所以不能作比較。

日劇第一集非常趕客！劇情悶爆！女主角小芝風花病樣真嚇人！仲要加鐘！睇到我好懷疑，係咪要繼續睇落去。

第二集好返少少，不過都未算入局，去到第三集先叫做好睇，之後幾集劇情都有追看吸引力，但臨尾兩集我又覺得扭得太多搞多咗！唔夠爽快！未能在最好時機完結，大結局一集反高潮老土又悶！

這是網劇，每集大約一個鐘頭多少少，比正常日劇40分鐘左右長，問題係套劇好睇，長啲梗係好，但呢套係愈拖長愈悶，剪返40分鐘一集可能較恰當。

「侏羅紀世界：重生」我覺得係目前為止這電影系列中故事最差！最差！最差！拍得最悶！最悶！最悶嘅一套！套路照板煮碗毫無新意！人物角色全無故事可言！可以講接近荷里活B級片水平！

仲有，故事尾後出現嘅基因合成新品種恐龍，已經唔係恐龍，係鹹蛋超人嗰類怪獸！如果拍恐龍片睇恐龍已經拍到悶拍到冇嘢好拍，不如唔好再拍！或者開拍哥斯拉x金剛x侏羅紀！呢套係掛上侏羅紀品牌賣怪獸嘅爛片爛片爛片！

2019年日劇「摘星廚神」講大叔大嬸追夢，當時我正參與「漫畫Buddy」工作，有很多對號入座情節，所以套劇真係打動到我，覺得好睇！

上年電視播出的「摘星廚神特別版」雖然劇情與電視劇套路大致上相同，但幾年冇續作，睇完感覺都算良好。

不過2024年尾上映嘅電影「摘星廚神·巴黎夢」就令我失望了！故事又係同一模式，而且拍唔出以前嘅熱血！熱情！熱誠！感覺非常拘謹，加入韓星參演只係商業噱頭，在故事上沒有幫助，我睇嘅時候有幾次瞌眼瞓。

一排冇睇綾瀨遙，日劇「孤獨死又怎樣」又係改編自漫畫，所以睇。全劇只有6集，以為好易睇，點知完全中伏！中伏！中伏！

年老孤獨死主題吸引到我，內容對白算有意思，但拍攝上就非常沉悶，第一集帶點漫畫化，仲算可以。但第二三集就出晒事，大部份畫面係兩人對坐對話，或三人對話，篇幅長要聽日語睇中文字幕，就好似返學上課睇住課本聽老師講書一樣，悶到想瞓！想熄機唔睇！

第四五集畫面稍為多少少變化，但同樣太多對談實在好悶，母女Hip Hop Battle rap一段演出生硬，非常失控，毫無Hip Hop味道！之後劇情開始講愛情有啲啲離題，睇第五集時多次想瞓。

結局一集開始又係兩人長篇對談，跟住轉場勉強兜回主題作結，整體上實在吃力不討好，如果可以重新選擇，我唔會睇呢套日劇。

今集超人電影並非非睇不可，但純粹想娛樂一下，視覺上刺激一下，係爽快嘅！開場第一幕係好吸引，不過預告片已經睇過多次，超人同女友Lois性格差異嘅愛情線輕描淡寫都ok，雞蛋裡挑骨頭係有，例如我唔鍾意綠燈俠同卓越先生嘅造型，綠燈俠更是騎呢怪！

大結局就係大晒，如果唔係大結局，如果唔係睇咗職業特工隊咁多年，呢套電影我應該睇30分鐘就捱唔住熄機放棄！

上集已經拖得好長好悶，今集繼續拖得好長好長好長好悶好悶好悶！套路同以往一樣！零新意！反而舊的片長所限節奏更爽快更緊張刺激，唯一只能讚湯告魯斯在雙翼機上好努力演出。

當日決定唔入戲院睇絕對正確。

點都好......職業特工隊始終係陪伴我成長嘅其中一套荷里活電影。