Day1
今日勁黑！專登買支銀筆處心積慮開工砌佢，一開波右胸甲油得好滿意，跟住油左邊就撻咗Q！
冇乜經驗下嘗試盡力補救補救不斷補救，搞咗133分鐘(今日由開始砌嘅總時間)，最後補救唔到仲無心之失整斷埋，粗口都冇乜心情講了，冷靜下，諗下有咩方法可以接受唔完美下修補佢，砌一隻不完美屬於自己獨一無二版本嘅Zero萬能俠，諗到辦法前可能先放埋一邊。
雖然老友話幫我修復件件，真係好多謝佢嘅義不容辭，但心裡耿耿於懷，自己眼高手低搞出禍，好想用自己有限嘅能力補鑊，要100%復原對我嚟講係冇能力做到，只有用其他方法解決，想起鐵甲萬能俠超合金賀歲生肖版胸口花紋，就試搵搵有冇類似圖案嘅紙品，又真係搵到一張幾合眼緣又好似幾夾隻模型，決定剪裁好佢用嚟補救，補救完後都算自己接受到。
Day 2
今日70分鐘搞咗個頭，主要係畫線畫牙罅油口腔油座艙罩，影相放大睇先發現有啲位油出界，稍後再執執佢，個頭夠惡好型，可惜先天缺陷上唇同門牙有條小小膠料水紋。
Day 3
今日60分鐘砌完胸部腰部，考慮緊好唔好乾擦少少銀油做磨花崩邊效果，對比之前砌ENTRY GRADE νガンダム，覺得呢盒模型水口位較粗較厚要多少少時間刮平。
Day 4
今日40分鐘，只係砌咗條三角褲，冇乜嘢砌又搞咁耐，因為十字星水口大粒位置開得唔好，用咗唔少時間削平。
Day 5
今日100分鐘，冇乜嘢砌到，只係將肚兜粒十字星油暗少少，剪下削好Zero Scrander部件，塗抹做完半件Zero Scrander污糟質感同畫線，塗抹過程太投入完全唔知搞咗咁耐，仲有半件未搞......
Day 6
今日80分鐘，搞埋Zero Scrander下半部，完成Zero Scrander。
冇搞一個禮拜終於抽到少少時間砌，心想砌但不在狀態，45分鐘砌唔到幾多得一隻上臂，黑色件畫灰色線會唔會嘥心機？其實唔係好睇到，只係自我感覺做咗嘢，有諗過畫暗紅色或暗藍色，不過都係用咗灰色。
今日爽手咗，80分鐘砌埋另一隻上臂同一隻前臂，唯一撠手係灰色細細粒嘅手骹關節，部件難插入，尋日另一邊同一部件同樣用咗啲時間先搞掂。
尋日畫灰色線，今日覺得寡咗啲，部份補畫紅色，Marker畫完出嚟反光時金金哋都幾特別。
今日有啲眼瞓，不過都係想盡快砌好佢，因為已經搞咗好耐超出預期。
今日120分鐘盡情砌，但其實砌嘅嘢唔多，六個拳頭手掌都幾消耗精神同時間，跌入無限輪迴，有啲水口位好粗唔平要剪要削，砌埋淨低隻前臂插埋手刀，手刀塗抹上紅線。
Day 10
今日有啲佗佻或是猶豫，思考砌邊part好對腳邊度要點色，只係少少畫線同點色緩慢到難以置信，最後砌咗對鞋，咁就過咗100分鐘。
Day 11
70分鐘砌咗隻腳，尚餘另一隻腳同地台支架就完工。
Day 12
今日142分鐘，砌埋隻腳同地台總算砌完，多得老友幫忙網購整爛咗嗰塊胸口補件，仲噴埋銀油唔使我自己油，咁就唔需要用自己搞嗰塊剪紙圖案部件。
第一次砌呢種地台，地台有好多餘下部件其實冇需要用到，掉又有啲浪費都剪好批埋keep起，最後仲剩餘一批多出嘅上一款萬能俠散件，同樣冇用掉了覺可惜，稍後再抽時間剪晒出嚟保留。
呢隻HG鐵甲萬能俠ZERO infinity，斷斷續續唔經唔覺搞咗一個月，完全超出預期，係目前為止我砌得最耐最慢嘅模型。
Day 13
35分鐘剪埋呢堆冇用嘅件，叫做完咗件事。
完工，影下相。
沒有留言:
張貼留言