Netflix日劇玻璃之心(GLASS HEART)宣傳好犀利，係近期話題網劇，我覺得拍攝係用心，畫面設計、剪接、字體擺放有用腦，歌曲同配音悅耳，整體充滿青春氣息，如果我仍是中小學生應該會鍾意睇！
主觀講，我覺得故事同離地少女漫畫冇乜分別，非常簡單普通唔吸引，描寫太過表面，過份浪漫化，甚至神化，臨尾劇情卻非常非常非常核爆級老土！亮點只係賣靚仔演員：佐藤健、町田啓太、志尊淳，同埋J-POP音樂，女主角宮﨑優完全吸引唔到我，好難理解劇中她吸引到兩個充滿才華靚仔。
我從幪面超人電王開始睇佐藤健，雖然唔係全部有他參演嘅電視劇電影都睇晒，應該睇咗七八成，今次他在玻璃之心(GLASS HEART)表現嘅Chok，我真係覺得over晒，而且他這角色根本係「人格分裂」，只係唔做壞人壞事，全部都係冧死女才子人格，作為男士我係有啲難頂，難以投入。
因為想睇女主角Vanessa Jane Kirby，所以睇Netflix電影Night Always Comes(黑夜終至)，點知......
首先，我誤會這電影係商業娛樂性高嘅犯罪驚悚動作電影，而實際上係由一件小事要解決，之後走嚟走去，將雪球愈滾愈大嘅故事，雖然有啲悶，但都好想睇埋個結局，想睇下會堆到幾大鑊點樣收科。
點知結局完全反高潮，沒有大爆發，竟然係寫母女情，對談完事！故事編劇本身冇錯，只係我對錯號入錯座......。
電影［8號出口］好好睇！好好睇！好好睇！
冇收錢，冇收禮，純個人口味個人觀感，至於套戲有幾好睇？我唔想劇透，總之講多一次，電影［8號出口］好好睇！好好睇！好好睇！純個人意見！亦好適合入戲院睇，懸疑驚慄氣氛一流！
令和第6部幪面超人系列，幪面超人加芙播完了！我睇得幾舒服，冇投訴。
男主角設定討好，故事前半部幾好睇，家族仇怨、殺母之仇、友情考驗、是敵是友、人類成為黑暗零食原材料、每個角色都有自己行動目的，以上種種堆積豐富，張力十足。
不過激情過後，後半部就溫和下來，劇力高潮不多，結局較為平淡，但算有始有終故事完整，純個人口味，這套係我心中目前令和幪面超人的三甲之一。
幪面超人加芙造型方面，我幾鍾意蛋糕型態。
看我今天怎麼說是一套很有心的電影，主演的鍾雪瑩、吳祉昊、游學修都演得很好，鍾雪瑩的最佳女主角名譽確實真材實料，不容置疑。
這個故事並非我的生活世界，睇完多多少少都領略到聾人社群的生活點滴，在香港這商業社會，有投資者有導演有編劇打造這電影，是難得的。
正常健全的普通人，在夢想與現實生活之間要作選擇不是容易事，聾人又有能力去作出選擇嗎？現今社會要做一個真實的我有多難呢？
睇鬼佬喜劇唔係經常識笑，點解？即係鬼佬睇周星馳喜劇唔明白香港獨特無厘頭文化一樣唔識笑。
但呢套神探零零甩真係好鬼好笑！我真係笑出聲唔少次，套戲真係幾無厘頭，哈哈哈哈哈......！
「異形：地球」雖然劇集未播完，都想唔劇透講下，第一二集同日上架，高興睇返電影第一集的太空船船艙設定，連睇兩集有少少悶，故事雖有些少新概念，可惜睇落普普通通新鮮感欠奉，不過總算順利睇完頭兩集。
第三集劇情有驚喜！忽然對劇集有期望！
不過刺激過後第四集隨即平靜平淡！第五集突然講前事，但去到這集已冇交代必要！我睇到中途短暫瞓著還發夢再夢醒！
第六集剛剛睇完，劇情依然極緩慢，只係多少少外星生物畫面醒醒神。
暫時唯一讚賞係女主角Wendy非常入型入格，造型討好，出Figure一定吸引！
沒有留言:
張貼留言