2025年10月8日 星期三

金剛飛天鑽/磁力鐵甲人

金剛飛天鑽/磁力鐵甲人

童年時在佳藝電視兒童節目《301部隊》時段睇「金剛飛天鑽」動畫,睇睇下佳視就執笠冇得睇,幾年後這動畫改名「磁力鐵甲人」在TVB播出,好開心有得再睇,當時好鍾意睇,會模仿他的招式,會將自己縮埋扮變個頭。


40幾年後,最近的起心肝搵返再睇,很多劇情已忘記,人大了睇嘅時候感覺大大不同,頭十集麻麻地,單元故事唔吸引,幾鬆散有點難捱,男主角司馬宙被車撞被雷電劈頭都冇事,一直以為自己的不死身係鍛鍊得來,能夠變身成超人同金剛飛天鑽/磁力鐵甲人係因為爸爸給他的手套,這兩點真係太過天真無邪!


之後劇情轉好,主角懷疑自己身體構造,內心有矛盾有掙扎,節奏開始緊湊,故事凝聚到張力。去到27集係個重大轉捩點,司馬宇特訓後強化成新超人型態,金剛飛天鑽/磁力鐵甲人不斷推出新裝備,包括飛輪部件、天空裝備、海洋裝備、大地裝備、戰甲飛馬等等,集集新鮮!敵陣亦大換血,新大波士新勢力登場,以童心角度睇真係高潮迭起緊張刺激!



高潮雖難維持到46集大結局,氣勢都保持到第44集。不知為何?估計多數是商業因素,第45集急急大結局,這一集很失望,前半集未入肉,後半集大波士一瞬間就被冇經心思設計的決鬥打敗!金剛飛天鑽/磁力鐵甲人動畫版整個故事就此完結,第46集是可以不看的純回顧沒有新元素總集篇。


能夠再睇一次「金剛飛天鑽/磁力鐵甲人」,就算感受與童年時有差別,製作水準不算好,人物經常走樣,但都是很開心,沒有覺得浪費時間。


據知這套1975年動畫「金剛飛天鑽/磁力鐵甲人」漫畫原著故事同動畫版不同,在2007年製作的動畫續集「鋼鐵神Jeeg」故事是根據漫畫版再發展。




「鋼鐵神JEEG」共13集,故事發生在前作「磁力鐵甲人」漫畫原著故事50年後,故事本身唔差,但劇情節奏不理想,頭段開得好睇,跟住就拖拖拉拉進展停滯,雖然臨尾舊主角司馬宇出現,卻沒有太多發揮,最後草草打完收場,新男主角過份熱血冇腦,描寫唔到佢成長,又搶去舊主角鋒芒,我對佢印象真係麻麻。


製作上頭兩三集較高質,之後水準普通,鋼鐵神JEEG最終型態幾吸引,可惜出場一陣就打完,欣賞重複運用嘅合體和出動畫面,有速度有力量特別靚,主題歌好聽。

沒有留言:

張貼留言