近日網友提及TVB電視劇「灰網」，我以前冇睇，翻查資料這是1991年TVB全年最低收視劇集，忽然有興趣想睇，睇完全劇25集，不是彈而係讚，撇除舊陣時TVB劇集廠景的簡陋粗糙，「灰網」劇本算細膩，角色描寫用心，演員落力到位，戲味濃郁，有追看性，男主角程浩人生大起大落曲折離奇很吸引！
故事如劇名一樣「灰」！講低下階層生活窮困苦惱，在社會拼搏上游屢遇挫折，事業愛情友情考驗重重，充斥愁雲慘霧！較玄妙是不要亂發誓，破誓者需承擔後果！當時低收線，可能係觀眾放工回家只想放鬆，不要睇寫實沉重悲情劇。三十多年後的今天，這種悲情有它獨特的珍貴，可以上訴推翻當年收視口碑敗績。
人會老會走樣會肥，鄭伊健近年亦唔介意真性情真面目示人，放低偶包演活角色係演員專業態度，但鄭伊健在我心中始終係極速傳說SKY哥哥、古惑仔陳浩南！「久別重逢」他飾演失意落泊中年，殘樣盡現我真不想看。
電影故事概念唔錯，有新海誠「你的名字」和「天氣之子」影子，但低成本港產片無法同日本成功動畫相比，蛋中挑骨，我覺得穿越方式太普通欠設計心思，蔡思韵演中年女主角戲份太少，許恩怡演女主角少女版在娛樂趣味上可多些發揮，這電影需要多些活力作平衡打破愁眉不展氣氛。
電影神奇4俠英雄第一步，無論在故事、畫面設計、打鬥都可以用「平平無奇」四個字形容，對電影無期望所以睇完冇發火。
打鬥少，娛樂性低，其實幾悶，故事唯一重點，超級英雄雖說能力愈大責任愈大，但不是老馮要為人犧牲。
飾演隱形女俠的Vanessa Kirby很投入，演技好，日後星途應該更發光發亮。
童年睇神奇4俠卡通片，只對霹靂火同石頭人有好感，對造型冇面罩人臉示人嘅神奇先生同隱形女俠冇興趣。
阿龍，雖然寫出一個故事，表達訊息略嫌老土，電影拍得唔好睇！缺乏張力，節奏進退失據，女主角的故事寫得有心思又充實，但打散了男主角主軸氣脈，如果能避重就輕或抽掉枝節，簡單直接集中焦點在復仇上可能會好睇，甚至可以改改形式，好似Jason Statham主演的動作復仇電影只求刺激，有足夠娛樂給觀眾就夠，反正電影主題都係復仇，劇情走線雷同，阿龍造型亦類似。
我覺得最差一幕係男主角入獄後，一場疑似一鏡過打鬥，畫面設計上是天下無敵，但拍出來就無能為力，為一鏡過配合走位，動作軟弱無力左就右就，類似畫面同電視劇夜魔俠相比真係失禮。
鄭中基有份導演同編劇，他的角色戲份極重，演技上有很多發揮，不過太多太豐富太複雜太賣弄有時未必是好。
這電影香港票房似乎慘淡收場，希望製作團隊吸取經驗不要泄氣。
怪獸8號動畫第一季，故事張力十足！有夢想！夠熱血！戰友兄弟情濃郁！製作水準穩定！戰鬥畫面強勁！我睇到熱血沸騰！
但第二季就大大跌watt！只有11集，前半段不斷拖長集數進行「龍珠」式打鬥，劇情空洞，角色成長模式單一，最後兩集先有高潮，不過只係另一場關乎人類存亡嘅世紀大戰序幕，結尾在最老土劇情下暫完，之後等待第三季，真冇癮。
Netflix電影《10號艙房的女人》睇預告片很吸引，我好耐冇睇女主角Keira Knightley電影，早兩日睇完第一幕就冇繼續落去，因為在辦公室齋講勁悶。
昨晚再嘗試睇，過了第一幕後到遊艇案件場地又係勁悶，因為同一般懸疑兇案片搵誰是兇手開始模式一樣，一班人見面認識下行行企企吹吹水未入戲肉。
過了上半場，下半場先有驚悚懸疑氣氛，先至好睇，劇本其實唔錯，只係拍攝上前半段太慣性沒趣，冇張力未營造到氣氛。問我值唔值得花時間睇？我會話睇心情同有冇時間，因為精彩同悶各佔一半，有捱得過上半場的心態不妨一看。
Keira Knightley真係老了，另外電影選用一位經常飾演大壞人的演員，先入為主就覺得他是兇手！繼續睇只為證實是否估中，同埋想了解當中過程和最後發展係點？
沒有留言:
張貼留言