勇者雷登

1975年日本動畫「勇者雷登」在香港從未播放，我細細個已想睇但一直未有機會，近日終於搵到頻道睇完全劇50集，感覺同想像中非常不同！有點驚訝！

故事主題妖魔帝國要打倒勇者雷登，奪取由它守護的遠古神秘能量統治地球，不過嚴格說50集劇情空洞，機械人戰鬥佔每集八九成時間，其餘穿插無聊鬧劇，由一班小朋友組成的赤團十分吵鬧令我討厭！甚少有的單元故事都冇劇情可言，作用只係推動戰鬥，雷登和地球遠古文明帝國的關係，男主角身份謎團和尋母劇情，都冰山一角合計少於10集，每次略略提及後又打打打打打又打完一集。

勇者雷登能有50集這麼受歡迎一定有原因，商業上週邊產品好好賣是其一！另一或是幼稚園至初小年齡層觀眾很受落，回想我仍是幼稚園至小一小二時，睇機械人動畫都是追求不停打打打打打打打打，期待不停出新招新武器就刺激了！有冇豐富劇情並不重要！如果大量文戲就算對故事有推進會覺得悶。

不過我童年冇得睇勇者雷登，冇美好回憶，在今天大叔年紀先初次去睇，係有點乏味，純粹因為對雷登造型充滿愛！才可睇完50集。

有個有趣設定，就係雷登絕招「念動光線神阿爾法」非常屈機，每次出這招所有危機疑難雜症都能不合理下完全化解！充滿童真想像！還有雷登自動修復力很高，好多時被敵人打到身體穿窿龜裂，駕駛艙被插穿轉頭就復原。

我讀緊幼稚園，婆婆帶我到油麻地永安百貨，玩具部在地面後門的角落位，在貨架下掛著一幅60塊嘅勇者雷登砌圖，砌圖幅畫係雷登招牌式射箭，非常靚好吸引，我即刻對雷登一見鍾情要買，婆婆話我太細個唔識砌，所以唔買，過咗兩個禮拜左右，婆婆又帶我去呢間永安百貨，我又見到呢塊雷登砌圖，又扭計要婆婆買，今次婆婆終於肯買畀我，以我幼稚園嘅智慧、耐性同能力，在婆婆家砌咗3日先砌返好呢60塊嘅砌圖，當時真係勁滿足，呢個情景呢份情懷幾十年後依然留在心中！